Hum Ke Thehray Ajnabi Itni Madaraton Ke Baad by Faiz

Hum Ke Thehray Ajnabi Itni Madaraton Ke Baad
Phir Banain Ge Aashna Kitni Mulaqaaton Ke Baad ?
Kub Nazar Mein Aaye Gi Be-Daagh Sabzay Ki Bahaar
Khoon Ke Dhabbay Dhulain Ge Kitni Barsaaton Ke Baad ?
Thay Bohat Be-Dard Lamhay Khatam-e-Dard-e-Aashiqui Ke
Theen Bohat Be-Meher Subhain Meherbaan Raaton Ke Baad
Dil Tou Chaaha Per Shikast-e-Dil Ne Mohlat Hee Na Di
Kuch Gilay Shikway Bhi Kar Laitay Manajaaton Ke Baad
Un Se Jo Kehnay Gaye Thay “Faiz” Jaan Sadqa Kye
An Kahee Hee Reh Gayi Wo Baat Sab Baaton Ke Baad

Zikr-e-Shab-e-Firaq Se Wehshat usey Bhi Thi by mohsin

Zikr-e-Shab-e-Firaq Se Wehshat usey Bhi Thi Meri Tarha Kisi Se Muhabbat usey Bhi Thi
Mujh Ko Bhi Shoq Tha Naye Chehron Ki Deed Ka Rasta Badal Ke Chalne Ki Aadat usey Bhi Thi
Us Raat Dair Tak Wo Raha Mahw-e-Guftagu Masroof Main Bhi Kam Tha Fursat usey Bhi Thi
Sunta Tha Wo Bhi Sab Se Purani Kahaniyan Taaza Rifaqton Ki Zarorat usey Bhi Thi
Mujhse Bichar Ke Shehar Main Ghul Mill Gaya Wo Shakhs Halan Ke Shehar Bhar Se adawat usey Bhi Thi
Wo Mujhse Bhar Ke Zabt Ka Aadee Tha Jii Gaya Warna Her Ek Saans Qiyamat usey Bhi Thi

Ujre Hue Logon Se Gurezaa Na Hua Kar by mohsin naqvi

Ujre  Hue Logon Se Gurezaa Na Hua Kar
Halaat K Qabron K Ye Kutbey Bhi Parha Kar

"Kia Janye Kiun Taiz Hawa Soch Men Ghum Hai
Khuwabaida Parindon Ko Darakhton Se Uraa Kar

"Us Shakhs K Tum Se Bhi Marasim Tou Honge
Who Jhoot Na Boly Ga Mere Samney Aakar

"Ab Dastaein De Ga Tu Kahan A Gham-E-Ehbaab
Men Ne Kaha Tha K Mere Dil Men Raha Kar

"Wo Aaj Bhi Sadiyo Ki Musafat Pe Khara Hai
Dhudha Tha Jisay Waqt Ki Diwaar Gira Kar

"Ae Dil Tujhe Dushman Ki Bhi Pehchan Kahan Hai
Tu Halqa-E-Yaraan Men Bhi Muhtat Raha Kar

"Men Mar Bhi Chuka ,Mil Bhi Chuka Mouj-E-Hawa Men
Ab Rait K Seenay Pay Mera Naam Likha Kar

"Pehla Sa Kahan Hai Ab Meri Raftaar Ka Aalam
A Gardish-E-Doraan Zar Tham Tham K Chala Kar

"Is Rutt Men Kahan Phool Khilen Ge Dil-E-Nadaan
Zakhmon Ko He Wabasta Zanjeer-E-Saba Kar

"Ik Rooh Ki Faryad Ne Chonka Diya Mujh Ko
Tu Ab Tou Mujhe  Jism K Zindaan Se Reha Kar

"Har Waqt Ka Hasna Tujhe Barbad Na Kar De
Tanhai K Lamhon Men Kabhi Ro Bhi Liya Kar

"Is Shab K Muqaddar Men Sehar Hi Nahi Mohsin
Dekha Hai Kai Charagon Ko Bujha Kar

Aankhain khuli rahain gi toh manzar bih ayengai by mohsin

Aankhain khuli rahain gi toh manzar bih ayengai
Zinda hai dil toh aur sitamgarr bhi ayengai

Pehchaan lo tamaam faqeeron kay khadd-o-khaal
Kuch log shab ko bhais badal kar bhi ayengai

Gehri khamosh jheel kay paani ko yun na chaidh
Cheenthay uday toh teri qaba par bhi ayengai

Khud ko chhupa na sheesha garon ki dukhaan mai
Sheeshay chamak rahey hain toh pathar bhi ayengai

Aye shehr yaar dasht say fursat nahi — magar!!
Niklay safar pay hum toh teray ghar bhi ayengai
 
Mohsin abhi saba ki sakhawat pay khush na ho
Jhonkay yehi basoorat-e-sarr sarr bhi ayengai

Mohsin naqvi Poetry

Siah Raat Mai Jalte Hain Jugnu Ki Tarah

Dilon Ke Zakhm Bi Mohsin Kmal Hote Hain

aesy dastoor ko main nahi manta by Habib Jalib

Deep jis ka sirf mehellaat
hi main jalay,
Chand logon ki khushyon
ko lay ker chalay,
Wo jo saye main har
maslihat kay palay;
Aisay dastoor ko,
Subh e bay noor ko,
Main naheen maanta,
Main naheen jaanta.
Main bhee kha’if naheen
takhta e daar say,
Main bhee Mansoor hoon,
keh do aghyaar say,
Kyun daraatay ho zindaan
ki divar say,
Zulm ki baat ko,
Jehel ki raat ko,
Main naheen maanta,
Main naheen jaanta.
Phool shaakhon pay
khilnay lagay tum kaho,
Jaam rindon ko milnay
lagay tum kaho,
Chak seenon kay silnay
lagay tum kaho,
Iss khulay jhoot ko,
Zehan ki loot ko,
Main naheen maanta,
Main naheen jaanta.
Tum nay loota hai sadyon
hamara sakoon,
Ab na hum per chalay ga
tumhara fasoon,
Chara gar main tumhain
kiss tara say kahoon?
Tum naheen charaagar,
Koi maanay magar,
Main naheen maanta,
Main naheen jaanta

Raaz-e-Ulfat Chhupa Ke Dekh Lia by Faiz Ahmad Faiz

Raaz-e-Ulfat Chhupa Ke Dekh Lia
Dil Bohat Kuch Jalaa Ke Dekh Lia
Aur Kia Dekhnay Ko Baaki Hai ?
Aap Se Dil Lagaa Ke Dekh Lia
Wo Mere Ho Ke Bhi Mere Na Howay
Un Ko Apna Banaa Ke Dekh Lia
Aaj Unki Nazar Mein Kuch Ham Ne
Sab Ki Nazrain Bacha Ke Dekh Lia
“Faiz” Takmeel-e-Gham Bhi Na Ho Saki
Ishq Ko Aazmaa Ke Dekh Lia

Zulm Rehy Aur Aman bhi ho by Habib Jalib

Zulm Rehy Aur Aman bhi ho
Kya mumkin hai tum hi kaho
Her Dhadkan pe khuaf k pehry
Her Aansoo per pabandi
Ye Jeewan bhi kya jeewan hai
Aag Lagay Iss jeewan ko
Zulm Rehy Aur Aman bhi ho 

Battay Raho Ge Tou Apna Yuhni Bahay Ga Lahoo By Habib Jalib

Battay Raho Ge Tou Apna Yuhni Bahay Ga Lahoo
Huay Na Ek Tou Manzil Na Bun Sakay Ga Lahoo

Issi Tarha se Agar Tum Anna Parast Rahy
Khud Apna Rahnuma Aap He Banay Ga Lahoo

Sadda Kaha Yehi Maine Qareeb Tar Hai Wo Doar
K Jis Main Koi Hamara Pee Na saky Ga Lahoo

Sab se chupa ker durd jo wo muskura diya by mohsin

Sab se chupa ker durd jo wo muskura diya

Uski hansi ne to aaj mujhe rula diya

Lehje se uth raha tha Her ik durd ka dhuwa’n

Chehra bata raha tha ke kuch ghanwa diya

Awaz mein tehraoo tha ankhoon mein nami thi

Aur keh raha tha ke mein ne sab kuch bhula diya

Janay kia usko logoon se thien shikyatien

Tanhayoon ke dais mein khud ko basa diya

Khud bhi wo hum se bichar ker adhoora sa ho gaya

                    mujh ko bhi itne logoon mein tanha bana diya